Para apoiar a creación de novas empresas desde o talento emprendedor a Xunta de Galicia súmase á aceleradora de empresas do consorcio achegando a través de Gain e Xes Galicia 250.000 euros a fondo perdido e 500.000 en préstamos participativos - Actualidade
Actualidade
Para apoiar a creación de novas empresas desde o talento emprendedor a Xunta de Galicia súmase á aceleradora de empresas do consorcio achegando a través de Gain e Xes Galicia 250.000 euros a fondo perdido e 500.000 en préstamos participativos
Data: mércores, 02 de xullo de 2014
O programa de apoio e asistencia a emprendedores do Consorcio da Zona Franca, "ViaVigo", convértese na aceleradora de empresas máis potente de toda España ó destinar ós dez proxectos seleccionados na súa segunda convocatoria un capital de 1.250.000 euros entre capital semente e achegas a fondo perdido mais outros 250.000 euros en gastos de formación e consultoría. Este é o resumo da rolda de prensa que deron esta mañá a delegada Teresa Pedrosa, Manuel Varela, director da Axencia Galega de Innovación, Juan Cividanes, director de XES Galicia e Pedro Núñez, director de Vigo Activo SCR, durante a que presentaron o acordo de participación da Xunta de Galicia na aceleradora do Consorcio e na que se anunciou a ampliación do prazo de presentación de ideas ata o 31 de xullo.
"Este convenio de colaboración e esta importantísima achega de capital que a Xunta de Galicia vai facer nos proxectos de ‘ViaVigo' é a materialización do compromiso de cooperación que asumimos o conselleiro de Economía e mais eu na súa pasada visita de abril ó centro de negocios de Porto do Molle. Podo afirmar sen ningún tipo de rubor que logramos que ‘ViaVigo' se converta na mellor e máis potente aceleradora de empresas de España", afirmou esta mañá Teresa Pedrosa.
Segundo explicou Manuel Varela, director da Axencia Galega de Innovación (GAIN), esta colaboración entre a Xunta de Galicia e a Zona Franca para impulsar o talento emprendedor materialízase na achega de capital que recibirán os dez proxectos que superen as fases de selección desta convocatoria de "ViaVigo" e entren na aceleradora para coadxuvar á súa saída ó mercado. Así, cada proxecto poderá recibir ata 25.000 euros a fondo perdido achegados por GAIN e a maiores –como comentou Juan Cividanes– ata 50.000 euros máis de préstamo outorgado por XES Galicia e ata outros 50.000 euros máis de capital semente a través da sociedade de capital-risco do Consorcio, Vigo Activo SCR.
Como sinalou Pedrosa, ademais do capital os activos intanxibles son a parte máis importante da aceleradora, "porque en ‘ViaVigo' dáselles soporte e asistencia a emprendedores e a empresas que se achen na súa fase inicial a través dun completo programa de aceleración para o desenvolvemento que dura un ano, durante o que se lles proporcionan formación, tutorías, mentoring, ferramentas de traballo en equipo, aloxamento e asesoramento intensivo co obxectivo de que as ideas de negocio saian ó mercado o suficientemente preparadas para chegar a ser empresas de éxito" dixo a delegada. Esta preparación, que deseña e asume na súa totalidade a Zona Franca, cuantificouse en arredor duns 25.000 euros por empresa.
"ViaVigo" é unha aceleradora de empresas e emprendedores deseñada polo Consorcio da Zona Franca de Vigo que ten aberto o prazo de presentación de ideas da súa segunda convocatoria e á que desde hoxe se suma a Xunta de Galicia para facilitar a creación de novas empresas que diversifiquen o tecido produtivo da comarca. Dada esta nova participación de GAIN e XES Galicia, o equipo promotor decidiu darlles máis facilidades e ampliar o prazo de inscrición de proxectos á segunda convocatoria de "ViaVigo" ata o 31 de xullo. Á primeira edición presentáronse 131 ideas de negocio de todo tipo de sectores, das que finalmente dez xa están a piques de terminar a súa fase de aceleración cun nivel de satisfacción altísimo. A inscrición a través da páxina web de "ViaVigo" non ten ningún custo e, como dixo Pedrosa, "dos emprendedores só requirimos tempo, dedicación e traballo duro".
Pedro Núñez animou a todas as persoas "que teñan un proxecto que crean poder converter en empresa ou un negocio que queiran levar a outro nivel a que accedan a este programa, a que entren en viavigo.es e se inscriban antes do 31 de xullo".
Nota de prensa
27/6/2014
Fonte: http://www.zonafrancavigo.com/
Rexistro
« | Setembro 2024 | » | ||||
---|---|---|---|---|---|---|
Lu | Ma | Me | Xo | Ve | Sa | Do |
1 | ||||||
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 |
- ChatBot, a automatización da atención ao cliente19 de setembro de 2024 11:00Máis información
- Primeiros pasos coa Administración Electrónica30 de setembro de 2024 11:00Máis información