Actualidade

« Atrás

Lanzamento da terceira edición do coworking de Barro-Meis

Data:  luns, 21 de xaneiro de 2019

Son moitas as persoas que teñen unha idea ou un proxecto en mente pero, por falta de apoio ou polas dificultades coas que teñen que lidar no seu día a día, deciden abandonalo. Neste sentido, buscando axudar a esas persoas, a Deputación de Pontevedra en conxunto coa Escola de Organización Industrial (EOI), lanzarán este próximo mes de febreiro a 3ª Edición do  Coworking que se realiza no viveiro de Barro. 
 
Do mesmo xeito que en convocatorias anteriores, preténdese contar cun total de 20 proxectos impulsados por emprendedoras e emprendedores que teñan un proxecto en fase temperá de desenvolvemento ou unha empresa recentemente creada. 
 
Durante o período que dura o coworking, desde o mes de febreiro ata xuño, os participantes contarán cun total de 100 horas de formación repartidas entre talleres formativos, dinámicas de grupo, titorías individualizadas coas persoas mentoras do proxecto ou seguimentos. Do mesmo xeito que nas pasadas edicións, o programa pechará co "DemoDay", unha xornada onde os e as participantes farán unha presentación individual dos seus proxectos. 
 
As emprendedoras e emprendedores que participen no proxecto, terán acceso a outros servizos de emprendemento promovidos desde a Deputación. Neste sentido, en Barro poderán facer uso de forma gratuíta do FabLab ou Laboratorio de Fabricación Dixital, así como participar da programación de talleres específicos que alí se desenvolven para poder coñecer desta avanzada tecnoloxía.
 
A través desta iniciativa, o que se pretende é fomentar o emprendemento e aumentar as posibilidades de éxito dos proxectos de negocio que participen nestes espazos, identificando as propostas de maior potencial de crecemento. 
 
Cabe sinalar que todas estas accións están subvencionadas, polo que o proxecto emprendedor non terá que asumir custos.
 
Se desexas máis información sobre a terceira convocatoria do coworking, podes acceder a través da seguinte páxina web ou pode inscribirse na seguinte ligazón.
 
 

Fonte:  SmartPeme