Actualidade

« Atrás

Incentiva que os teus clientes recomenden os teus produtos nas redes sociais.

Data:  mércores, 16 de setembro de 2015

 

Tanto as decisións de compra offline como en liña están influenciadas por recomendacións de familiares e amizades. No comercio electrónico tamén as vendas se ven poderosamente condicionadas polo que os influenciadores, os amigos ou familiares comentan nas redes sociais

Na actualidade e a diario unha ampla porcentaxe das compras que realizamos decidímolas por recomendacións que recibimos dos nosos familiares ou amigos. Isto é así desde hai moito tempo, pero quizais nestes momentos se acentuase esta tendencia, posto que a oferta de produtos e servizos é moito maior e os consumidores temos que discernir entre moitas máis referencias. As redes sociais e o uso masivo que facemos delas conseguiron que estas cifras se disparasen e que, por tanto, as vendas tamén percibisen este aumento.

Agora mesmo non concibimos a contratación dunhas vacacións ou a estancia nun hotel sen a realización dun proceso similar ó seguinte: buscar en Google, buscar o que necesitamos nalgún dos portais de reservas (como Booking, Expedia ou mesmo Turismo Rías Baixas) e, unha vez atopado o hotel ou aloxamento concreto, consultamos a sección de puntuacións recibidas por parte doutros usuarios do establecemento, ademais dos comentarios. Lemos moito antes o que poñen os usuarios sobre o establecemento que o que este pon sobre el mesmo.

Ademais hai que mencionar a tendencia de contar nas redes sociais, en todo momento, máis e máis cousas sobre os nosos hábitos de vida e sobre as accións e actividades que realizamos diariamente. É algo que facemos cada vez máis co afán de socializarnos, para que as nosas amizades saiban onde ou como nos atopamos, para que nos dean a súa opinión, para compartir o ben que o estamos pasando ou comentar algún contratempo. Os consumidores somos usuarios de redes sociais e subimos moita información, que usamos para guiar as nosas propias decisións. Entre a sobreinformación que sufrimos temos que analizar que é o que de verdade nos interesa e tratar de non equivocarnos, polo xeral non nos gusta aventurarnos demasiado.

Como sempre, hai moitos estudos que falan destas temáticas, estudos que lle poñen cifras a estas tendencias. Un dos máis recentes elaborárono dous expertos do Carlson School of Management, da Universidade de Minnesota. A súa conclusión principal é bastante interesante: os consumidores deixámonos influenciar en gran medida por opinións de influenciadores, amigos ou familiares, á hora de determinar unha compra en internet. Segundo os datos que se desprenden deste estudo, os consumidores somos un 60 % máis proclives a comprar un produto mediante comercio electrónico se as nosas amizades xa o fixeron antes.

 

Así que o dato é claro e diáfano: como calquera empresa, se queres vender en internet tes que incentivar que os teus clientes falen dos teus produtos e servizos nas redes sociais. Por iso, debes colocar estas accións no núcleo da túa estratexia de márketing e, por suposto, do márketing en liña. Deseñando e desenvolvendo o teu e-commerce de forma que sexa usable e que potencie a conexión coas redes sociais permitindo deixar opinións de cada un dos teus produtos ou servizos á venda. Que, dalgunha forma, sexa a propia clientela quen "cree" as descricións dos produtos, favorecendo ese labor de difusión e recomendación nas redes sociais da man das nosas marcas e empresas.

 

Autor: Alberto Falcón. Asesor CPAE 2.0 - Deputación de Pontevedra

 

Fonte:  CPAE



« Agosto 2019 »
Lu Ma Me Xo Ve Sa Do
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

Non hai eventos

Lenda:

Evento Aberto
Evento Pechado/Cancelado
Inscrito a este evento